Mohammad Sharfuddin Sahil
marbut kamyabi hai varastagi ke saath
rakh rah-e-pur-ḳhatar men qadam puḳhtagi ke saath
pyasa taḌap raha huun main dariya ke paas bhi
hai intiha-e-zulm miri tishnagi ke saath
zulmat-kade ko nuur ka maskan bana diya
hai raushni ko rabt hasin tirgi ke saath
bas is liye ḳhushi ki adavat ka huun hadaf
vabasta kyon alam hai miri zindagi ke saath
mera saval sharm se hota hai ab-ab
dete hain vo javab hi is sadgi ke saath
mashrab men mere dil ka dukhana gunah hai
kya vasta hai mujh ko tiri dil-lagi ke saath
‘sahil’ riya-o-makr ke sajdon se fa.eda
nadan kaam adl se le bandagi ke saath
Leave a Reply