hasr-afrin hai kucha-e-janana aj-kal
bahki hui hai ḳhu-e-muhibbana aj-kal
phir bik rahi hai jins-e-vafa kauḌiyon ke mol
phir har vafa-shi.ar hai begana aj-kal
phir uTh rahi hain dasht-o-bayaban ki raunaqen
phir har junun-frosh hai farzana aj-kal
phir shola-kar hain chamanistan-e-lala-zar
phir bijliyan hain raunaq-e-kashana aj-kal
phir har junun-sarisht ḳhirad se hai bahra-var
phir kho gaya taqaddus-e-virana aj-kal
har dil men jalva-rez hai phir jazba-e-ḳhudi
anqa hai etibar-e-mulukana aj-kal
phir miT ga.e dilon se junun-kar valvale
phir be-nava hain salma-o-rehana aj-kal
phir satgin unDel ke saaqi ne rakh diye
uThti hai har nigah harisana aj-kal
afsana ban ga.i vo raqabat vo chashmaken
dast-e-karam hai dast-e-harisana aj-kal
‘maz.har’ hadis-e-dard hai apni har ek baat
har ashk-e-gham hai ghairat-e-durdana aj-kal
Leave a Reply