Dil Jo Hansta Hai to Rone Ka Guman Hota Hai

Rahat Hasan

dil jo hansta hai to rone ka guman hota hai

ḳhud ko pa kar use khone ka guman hota hai

din ko jab ghar se nikalta huun to aksar mujh ko

saa.e ke bojh ko Dhone ka guman hota hai

jab bhi aati hai mire sahn men ḳhushbu-e-gul

tere ghar ke kisi kone ka guman hota hai

oḌh leta huun shararon ki rida.en jab men

reg-e-sahra pe bichhaune ka guman hota hai

narm hote hi badal jaati hai surat meri

yak-ba-yak chaak pe hone ka guman hota hai

ek hi ashk muqaddar se mila hai phir bhi

har kisi daagh ko dhone ka guman hota hai

hech thi meri nigahon men haqiqat lekin

ab to miTTi pe bhi sone ka guman hota hai

TuTne aur bikharne men laga huun jab se

mujh ko apne pe khilaune ka guman hota hai

paar karta huun samundar pe samundar ‘rahat’

phir bhi ḳhud ko hi Dubone ka guman hota hai