Arshad Abdul Hamid
mire ḳheme ḳhasta-hal men hain mire raste dhund ke jaal men hain
mujhe shaam hui hai jangal men mire saare sitare zaval men hain
mujhe rangon se koi shaghl nahin mujhe ḳhushbu men koi daḳhl nahin
mire naam ka koi naḳhl nahin mire mausam ḳhak-e-malal men hain
akash hai qadmon ke niche dariya ka paani sar par hai
ik machhli naav pe baiThi hai aur sab machhuvare jaal men hain
ye duniya akbar zulmon ki ham majburi ki anarkali
ham divaron ke biich men hain ham nargha-e-jabr-o-jalal men hain
mire dil ke nuur se baḌh ke nahin miri jaan ke surur se baḌh ke nahin
jo maah o mehr falak par hain jo laal o guhar patal men hain
ik maghrib aaya mashriq men miri fauj ke TukḌe kar Daale
ab aadhe sipahi junub men hain aur aadhe sipahi shumal men hain
iman ki chhagal phuuT ga.i amal ki laThi TuuT ga.i
ham aise gallabanon ke sab naaqe ḳhauf-e-qital men hain
Leave a Reply