bisat-e-rang-o-bu atish-fishan malum hoti hai
rag-e-gul men nihan barq-e-tapan malum hoti hai
tamanna hi se qaa.em hai vaqar-e-naujavani bhi
tamanna garche jins-e-ra.egan malum hoti hai
kinara hai koi is ka na is ka koi sahil hai
mohabbat ek bahr-e-be-karan malum hoti hai
guzishta vardaton par main jab bhi ghaur karta huun
mujhe har vardat ik dastan malum hoti hai
vafa-koshi ka jazba sard paḌ jaata hai piiri men
vafa parvarda-e-fikr-e-javan malum hoti hai
asar baaqi abhi tak hai nigahon men javani ka
mujhe har ek shai ab bhi javan malum hoti hai
jafa-o-jaur ke qisse hain ab bhi mo’atabar ‘farigh’
vafa ki baat zeb-e-dastan malum hoti hai
Leave a Reply