guman yahi hai ki dil khud udhar ko jaata hai
so shak ka faeda us ki nazar ko jaata hai
haden vafa ki bhi akhir havas se milti hain
ye rasta bhi idhar se udhar ko jaata hai
ye dil ka dard to umron ka rog hai pyare
so jaae bhi to pahar do pahar ko jaata hai
ye haal hai ki kai raste hain pesh-e-nazar
magar khayal tiri rah-guzar ko jaata hai
tu ‘anvari’ hai na ‘ghalib’ to phir ye kyuun hai ‘faraz’
har ek sail-e-bala tere ghar ko jaata hai
Leave a Reply