us husn-e-be-niyaz ke kuchh martabe the aur
meri udaas raton ke bujhte diye the aur
zaḳhmon ko nok-e-ḳhar ki lazzat pasand thi
vaise tumhare ghar ke ka.i raste the aur
main hi nahin tha khokhle peḌon ke darmiyan
mujh jaise na-shanas vahan par khaḌe the aur
is se bichhaḌ ke rone ki fursat nahin mili
qirtas-e-zindagi pe ka.i gham likhe the aur
daman men jo guhar hain natije hain ishq ke
pahle jo mere paas the vo aa.ine the aur
saaqi bacha li aabru tu ne ḳhud apni aaj
varna miri manzar men ka.i mai-kade the aur
jis ke ik ek misre men rahta tha us ka zikr
‘ajiz’ vo sher aur the vo qafiye the aur
Leave a Reply