achchha hua ye vaqt to aana zarur tha
muddat se kashmakash men dil-e-na-subur tha
duniya ka hoshiyar baḌa zi-shu.ur tha
jab tak mire kahe men dil-e-na-subur tha
mera qusur meri nazar ka qusur tha
vo jis qadar qarib tha utna hi duur tha
achchha hua jo dil ki taḌap aur baḌh ga.i
jaana bhi un ki bazm men mujh ko zarur tha
us be-nishan ka aaj nishan DhunDte hain aap
suniye vahi jo nazish-e-ahl-e-qubur tha
vo daur meri umr ka tha yadgar daur
jis men ki tere husn pe mujh ko ghurur tha
le aaya kaun gor-e-ghariban men khinch kar
koson abhi main manzil-e-maqsad se duur tha
vaa.iz ne zikr-e-va.ada-e-firdaus kyuun kiya
us rind se jo nashsha-e-vahdat se chuur tha
ab aa ke meri laash se farma rahe hain vo
‘alim’ ye teri aql-o-farasat se duur tha
Leave a Reply