yuun bhi tira ehsan hai aane ke liye aa
ai dost kisi roz na jaane ke liye aa
har-chand nahin shauq ko yara-e-tamasha
ḳhud ko na sahi mujh ko dikhane ke liye aa
ye umr, ye barsat, ye bhigi hui raten
in raton ko afsana banane ke liye aa
jaise tujhe aate hain na aane ke bahane
aise hi bahane se na jaane ke liye aa
maana ki mohabbat ka chhupana hai mohabbat
chupke se kisi roz jatane ke liye aa
taqdir bhi majbur hai, tadbir bhi majbur
is kohna aqide ko miTane ke liye aa
aariz pe shafaq, daman-e-mizhgan men sitare
yuun ishq ki tauqir baḌhane ke liye aa
‘talib’ ko ye kya ilm, karam hai ki sitam hai
jaane ke liye ruTh, manane ke liye aa
Leave a Reply