kal raat yuun hua ki pahar-do-pahar ga.e
koi kuchh aise chiḳh paḌa log Dar ga.e
Duuba gharib chand to agni baras paḌi
vo dhuup chamchama.i ki chehre utar ga.e
kuchh ajnabi si lagti hain shaḳhen hari-bhari
tha jin pe tera saaya vo patte kidhar ga.e
sapnon ki khoj hi men kaTegi ye raat bhi
aisi hava chali hai ki badal bikhar ga.e
is saal jin dinon men tira qurb tha nasib
aa.i na teri yaad vo din bhi guzar ga.e
rahon men yuun na baiTh rahen ḳhanuman-ḳharab
jin ki nazar hui thi vo sab log ghar ga.e
yuun to vo dekhne ko tha saada sa aadmi
jo log luT ga.e vo kisi baat par ga.e
barson hi us ne phuul khila.e hain dhuup men
ik umr ho chali hai jise baam par ga.e
Leave a Reply