tum shuja.at ke kahan qisse sunane lag ga.e
jitne aa.e the jo duniya Thikane lag ga.e
uḌ rahi hai shahr ke saare gali kuchon men ḳhaak
jitne ashiq the vo sab khane-kamane lag ga.e
rengti karen ubalti bhiiḌ be-bas raste
kal mujhe ghar tak pahunchne men zamane lag ga.e
us ne ham par ik mohabbat ki nazar kya Daal di
haath jaise ham gharibon ke ḳhazane lag ga.e
umr bhar karte rahe ham ek kuche ka tavaf
ek saa.e ke ta.aqub men zamane lag ga.e
zindagi dene lagi parhez-gari ka sabaq
ab to ham jaise bhi sabzi daal khane lag ga.e
Leave a Reply