Ab Kahan Le Ke Chhupen Uryan Badan Aur Tan Jala

Shahab Jafri

ab kahan le ke chhupen uryan badan aur tan jala

dhuup aisi hai ki saa.e se bhi pairahan jala

chhin lo ehsas mujh se chhin lo mera shu.ur

is ghaTa men tan phunka is raushni se man jala

zindagi dasht-e-sarab aur sar pe ik suraj muhit

main to main huun mere saa.e ka bhi sab tan man jala

kis sada ki zarb se TuuTa sukut-e-sang-e-dasht

ek chingari uḌi saara ka saara ban jala

dil jo tha siine men bach sakte the kab ahl-e-ḳhirad

shahr men ik shor tha daman jala daman jala

dil-dukhon ki ḳhaak par ki shab-nashini maah ne

din kabhi nikla to ik suraj sar-e-madfan jala

tirgi ki andhiyan uThti rahin har nuur se

ik charagh aisa hai siine men ki be-roghan jala

rafta rafta ho ga.e dast-e-talab ahl-e-junun

raston par sab liye baiThe hain ik daman jala

ghuT ke rah sakti thi kab tak atish-e-rang-e-bahar

zarb-e-mausam bhi kuchh aisi thi ki sab gulshan jala

jal gaya to kya hua aḳhir to main kundan hua

ham-nashin daman ki kya jab man jala daman jala