apne chaman pe abr ye kaisa baras gaya
har qatra zahar ban ke fazaon men bas gaya
sud-o-ziyan ki fikr ka kis ko raha dimagh
muddat hui ki hausla-e-pesh-o-pas gaya
ab jagte hain apni hi aahaT se qafile
rah-e-talab se sheva-e-bang-e-jaras gaya
ik sail-e-rang-o-nur se jal-thal hai ka.enat
kaisa ye tere jalvon ka badal baras gaya
dikhla.en ham shikastagi-e-bal-o-par kise
kahte hain log mausam-e-qaid-e-qafas gaya
charagaro ye zahr utaro to baat hai
tarikiyon ka naag zamane ko Das gaya
naqsh-e-qadam ka bhi koi milta nahin suragh
chupke se dil men aa ke mire kaun bas gaya
har lamha zindagi se ibarat tha jin dinon
kya kya na ham se le ke vo daur-e-havas gaya
‘hurmat’ ye dil hai apni tabahi pe jis ko naaz
vo phuul hai jo khilne se pahle bikas gaya
Leave a Reply