ye jo rah rah ke sar-e-dasht hava chalti hai
kitni achchhi hai magar kitna bura chalti hai
ek aaseb ta.aqub men laga rahta hai
main jo rukta huun to phir us ki sada chalti hai
haa.e vo saans ki rukti hai to kya rukti hai
haa.e vo aankh ki chalti hai to kya chalti hai
pesh-ḳhema hai kisi aur na.i vahshat ka
ye jo itra ke abhi bad-e-saba chalti hai
tiir chalte hain lagatar savad-e-jan men
aur talvar koi ek juda chalti hai
biich dariya ke ajab jashn bapa hai yaaro
saath kashti ke koi mauj-e-bala chalti hai
aaj kuchh aur hi manzar hai mire charon taraf
ghair-mahsus tariqe se hava chalti hai
main ba-zahir to huun asuda pa mere andar
dhime dhime se kahin ah-o-buka chalti hai
yuun to bebak bana phirta hai vo yaron men
us ki a.ankhon men ajab sharm-o-haya chalti hai
mere maula jo rahe sirf kaha tera rahe
mere honTon pe yahi ek dua chalti hai
Leave a Reply