Sham

Kaifi Azmi

mast ghata mandlai hui hai

baagh pe masti chhai hui hai

jhuum rahi hain aam ki shakhen

niind si jaise aai hui hai

bolta hai rah rah ke papiha

barq si ik lahrai hui hai

lahke hue hain phuul shafaq ke

atish-e-tar chhalkai hui hai

sher mire ban ban ke huvaida

qaus ki har angdai hui hai

rengte hain khamosh tarane

mauj-e-hava bal khaai hui hai

raunaq-e-alam sar hai jhukae

jaise dulhan sharmai hui hai

ghaas pe gum-sum baitha hai ‘kaifi’

yaad kisi ki aai hui hai