sitam ho jaa.e tamhid-e-karam aisa bhi hota hai
mohabbat men bata ai zabt-e-gham aisa bhi hota hai
bhula deti hain sab ranj o alam hairaniyan meri
tiri tamkin-e-behad ki qasam aisa bhi hota hai
jafa-e-yar ke shikve na kar ai ranj-e-nakami
ummid o yaas donon hon baham aisa bhi hota hai
mire pas-e-vafa ki bad-gumani hai ba-ja tum se
kahin be-vaj.h iz.har-e-karam aisa bhi hota hai
tiri dildariyon se surat-e-beganagi nikli
ḳhushi aisi bhi hoti hai alam aisa bhi hota hai
vaqar-e-sabr khoya girya-ha-e-be-qarari ne
kahin ai e’tibar-e-chashm-e-nam aisa bhi hota hai
ba-dava-e-vafa kyuun shikva-sanj-e-jaur hai ‘hasrat’
dayar-e-shauq men ai mahv-e-gham aisa bhi hota hai
Leave a Reply