ai dil ye hai ḳhilaf-e-rasm-e-vafa-parasti
tauba buton ke aage zikr-e-ḳhuda-parasti
ik ḳhanjar-e-qaza hai ik nashtar-e-jafa hai
vo chashm-e-shoḳh jo hai mahv-e-haya-parasti
dikhla.unga tamasha is aa.ine men tum ko
sub.h-e-azal se dil hai mahv-e-safa-parasti
zalim ki hai ye koshish is ko kahin miTa duun
mazlum dil ko mere fikr-e-baqa-parasti
kyuun saz-o-barg-e-hasti karta hai tu muhayya
duniya ko hai azal se zauq-e-fana-parasti
laa.i na mai-kade se vapas ‘aziz’ tujh ko
ye hikmat-o-tasavvuf ye auliya-parasti
Leave a Reply