dam-e-ta.amir taḳhrib-e-jahan kuchh aur kahti hai
kali kuchh aur kahti hai ḳhizan kuchh aur kahti hai
kada ki yaad sab kuchh hai magar ai zahid-e-nadan
dilon se masti-e-chashm-e-butan kuchh aur kahti hai
kabhi shayad vo daur aa.e jab insan ho sake insan
abhi to gardish-e-haft-asman kuchh aur kahti hai
bana kar ashiyane fasl-e-gul men shaad hain lekin
chaman valon se barq-e-be-aman kuchh aur kahti hai
bahut mushkil hai manzil tak jo ahl-e-karvan pahunchen
ki ham se gard-e-rah-e-karvan kuchh aur kahti hai
ye ghaflat ai hayat-e-chand-roza ke parastaro
uTho tum se hayat-e-javedan kuchh aur kahti hai
asar naghmon men bhi hai nala-ha-e-gham men bhi ‘sha.ir’
magar TuuTe hue dil ki fughan kuchh aur kahti hai
Leave a Reply