Rajinder Manchanda Bani
dekhiye kya kya sitam mausam ki man-mani ke hain
kaise kaise ḳhushk ḳhitte muntazir paani ke hain
kya tamasha hai ki ham se ik qadam uThta nahin
aur jitne marhale baaqi hain asani ke hain
vo bahut saffak si dhumen macha kar chal diya
aur ab jhagḌe yahan us shaḳhs-e-tufani ke hain
ik adam-tasir lahja hai miri har baat ka
aur jaane kitne pahlu meri virani ke hain
us ki aadat hai ghire rahna dhuen ke jaal men
us ke saare rog ik andhi pareshani ke hain
Leave a Reply