jaane kaisa ye nuur hai mujh men
chand koi zarur hai mujh men
koi padhta nahin kabhi us ko
vo jo bainassutur hai mujh men
jaane kis men hai ajizi meri
jaane kis ka ghurur hai mujh men
kahin bahar nazar nahin aata
mera dushman zarur hai mujh men
kirchiyan chubh rahi hain siine men
aaina chuur chuur hai mujh men
muddaton tak safar men rah kar bhi
koi manzil se duur hai mujh men
muntazir hai kisi tajalli ka
ek jo koh-e-tur hai mujh men
main ye mahsus kar raha huun ‘kamal’
koi mujh se hi duur hai mujh men
Leave a Reply