Sahir Hoshiyarpuri
ye iḳhlas-e-garan-maya bahut hai
tum aa.e dil ko chain aaya bahut hai
gham-e-dil ko bahut raas aa.e hain ham
gham-e-dil ham ko raas aaya bahut hai
fareb-e-dushmanan ham kha.enge kya
fareb-e-dostan khaya bahut hai
mubarak tum ko qasr-o-chatr-e-shahi
hamen divar ka saaya bahut hai
bahut ham ne bhi samjhaya hai dil ko
hamen bhi dil ne samjhaya bahut hai
usi duniya ko ham apna rahe hain
ki jis ne ham ko Thukraya bahut hai
ḳhuda rakhe use dil-shad ‘sahir’
ki us ne ham ko taḌpaya bahut hai
Leave a Reply