Suhail Kakorvi
dekhe jo dil ki sho.ala-fishani ke hausle
sahme hue hain us ki javani ke hausle
dekha mujhe to phir vo achanak kahan ga.e
ai tegh-e-naz teri ravani ke hausle
main paar kar ke nikla huun tufan-e-bahr-husn
pahlu men mere aa ga.e paani ke hausle
us ki nazar ka aks paḌa meri fikr par
us ne baḌha.e lafz-o-ma.ani ke hausle
muhtaj us ka ho gaya hasti ka saaz bhi
ye rang laa.e soz-e-nihani ke hausle
ham se ab us ke baare men puchhe na koi kuchh
dekhe hain ham ne raat ki raani ke hausle
bazar-e-dil men baanT di jins-e-giran ‘suhail’
yuun ham ne toḌ Daale girani ke hausle
Leave a Reply