Kaleem Aajiz
is naaz is andaz se tum haa.e chalo ho
roz ek ghazal ham se kahlva.e chalo ho
rakhna hai kahin paanv to rakkho ho kahin paanv
chalna zara aaya hai to itra.e chalo ho
divana-e-gul qaidi-e-zanjir hain aur tum
kya ThaaT se gulshan ki hava khaa.e chalo ho
mai men koi ḳhami hai na saghar men koi khoT
piina nahin aa.e hai to chhalka.e chalo ho
ham kuchh nahin kahte hain koi kuchh nahin kahta
tum kya ho tumhin sab se kahlva.e chalo ho
zulfon ki to fitrat hi hai lekin mire pyare
zulfon se ziyada tumhin bal khaa.e chalo ho
vo shoḳh sitamgar to sitam Dhaa.e chale hai
tum ho ki ‘kalim’ apni ghazal gaa.e chalo ho
Leave a Reply