hain na zindon men na murdon men kamar ke ashiq
na idhar ke hain ilahi na udhar ke ashiq
hai vahi aankh jo mushtaq tire diid ki ho
kaan vo hain jo rahen teri khabar ke ashiq
jitne navak hain kaman-dar tire tarkash men
kuchh mire dil ke hain kuchh mere jigar ke ashiq
barhaman dair se kaabe se phir aae haaji
tere dar se na sarakna tha na sarke ashiq
aankh dikhlao unhen marte hon jo ankhon par
ham to hain yaar mohabbat ki nazar ke ashiq
chhup rahe honge nazar se kahin anqa ki tarah
tauba kiije kahin marte hain kamar ke ashiq
be-jigar maarka-e-ishq men kya thahrenge
khate hain khanjar-e-maashuq ke charke ashiq
tujh ko kaaba ho mubarak dil-e-viran ham ko
ham hain zahid usi ujde hue ghar ke ashiq
kya hua leti hain pariyan jo balaen teri
ki pari-zad bhi hote hain bashar ke ashiq
be-kasi dard-o-alam daagh tamanna hasrat
chhode jaate hain pas-e-marg ye tarke ashiq
be-sabab sair-e-shab-e-mah nahin hai ye ‘amir’
ho gae tum bhi kisi rashk-e-qamar ke ashiq
Leave a Reply