apne andar se jo bahar nikle
ḳhud-numa.i ka samundar nikle
ab saza.en hi muqaddar Thahrin
taziyanon ke sana-gar nikle
aise bhi log hain is shahr men jo
dhuup men barf pahan kar nikle
faḳhtaon ka tamasḳhur tauba
chiyunTiyon ke bhi ajab par nikle
haath jab qabza-e-shamshir pe ho
kyuun na maqtal men dilavar nikle
khinch do daar pe dil-daron ko
shahryaron ka zara Dar nikle
jis bhi divar men dar karta huun
vahi divar pas-e-dar nikle
kashtiyan chhoḌ ke dariyaon men
regzaron se shanavar nikle
andhiyon men bhi khaḌe hain ab tak
ham daraḳhton se qad-avar nikle
bhiik us shahr men ham kya mangen
jis ke hatim bhi gadagar nikle
paanv men bandh ke ghunghru ‘mohsin’!
chand qabron ke mujavir nikle
Leave a Reply