dilon ke raaz sipurd-e-hava nahin karte
ham ahl-e-dil hain tamasha bapa nahin karte
kabhi gulon ki vo ḳhvahish kiya nahin karte
jinhen aziiz hain kanTe gila nahin karte
hamare naam se zinda hai sunnat-e-farhad
ham apne chak-e-gareban siya nahin karte
dilon men aa.e kahan se yaqin ki tasir
dua to karte hain dil se dua nahin karte
ye ishq-vishq ka chakkar faqat himaqat hai
zahin log himaqat kiya nahin karte
hamare tiir ko tukka kabhi nahin kahna
hamare tiir nishane ḳhata nahin karte
ye phuul un pe chaḌhate ho kis liye logo
shahid zinda hain un ka aza nahin karte
vo ḳhush-nasib hain rab ne jinhen navaza hai
ḳhuda ka shukr magar vo ada nahin karte
dilon ke daagh se raushan hai alam-e-hasti
dilon ke daagh kabhi bhi chhupa nahin karte
jahan men un ko milegi na manzil-e-maqsud
jo rasm-o-rah-e-mohabbat ada nahin karte
‘suhaib’ DhunDiye shayad ki raah nikle koi
faqih-e-shahr to sab se mila nahin karte
Leave a Reply