rabta laakh sahi qafila-salar ke saath
ham ko chalna hai magar vaqt ki raftar ke saath
gham lage rahte hain har aan ḳhushi ke pichhe
dushmani dhuup ki hai saya-e-divar ke saath
kis tarah apni mohabbat ki main takmil karun
gham-e-hasti bhi to shamil hai gham-e-yar ke saath
lafz chunta huun to mafhum badal jaata hai
ik na ik ḳhauf bhi hai jur.at-e-iz.har ke saath
dushmani mujh se kiye ja magar apna ban kar
jaan le le miri sayyad magar pyaar ke saath
do ghaḌi aao mil aa.en kisi ‘ghalib’ se ‘qatil’
hazrat ‘zauq’ to vabasta hain darbar ke saath
Leave a Reply