jab bhi badal barish laa.e shauq-jaziron se
ḳhosha ḳhosha harf ki belen bhar ga.iin hiron se
tum se mile to shahr-e-tamanna kitna phail gaya
kya kya ḳhvab na.e tamir hue tabiron se
ankhen rangon ki barsaten tak tak jhiil huiin
dil ne kya kya aks kashid kiye tasviron se
us ko chhune ki ḳhvahish ne haath baḌha.e to
phan phaila.e nikle kitne saanp lakiron se
‘ali’ danish ki basti men ab sardar vahi
DhunD nikale kuchh andhiyare jo tanviron se
Leave a Reply