ab itni arzan nahin baharen vo alam-e-rang-o-bu kahan hai
qafas men baiThe raho asiro abhi nasheman bahut giran hai
guzar raha hai jo dil pe aalam ayaan na hone pe bhi ayaan hai
abhi faqat qasd hai fughan ka abhi se chehra dhuan dhuan hai
kahin qayamat na uTh khaḌi ho zamin milti hai asman se
baḌi nazakat ki ye ghaḌi hai miri jabin un ka astan hai
ye ḳhushk-lab ye udaas chehra ye muzmahil muzmahil se aansu
yahi fasana yahi haqiqat yahi ḳhamoshi yahi zaban hai
ye sab hai nai-rang-e-ab-o-dana kahan huun main aah kya bata.un
yahi hain bas mere do Thikane qafas nahin hai to ashiyan hai
charagh hain asman ke ThanDe vo bijliyan sard paḌ ga.iin sab
na ab vo tufan-e-rang-o-bu hai na ab chaman hai na ashiyan hai
dhuan chhaTa sho.ale raqs men hain nazar uTha dekh raushni men
ye tujh ko kya ho gaya hai hamdam tira nahin mera ashiyan hai
uruuj par hai mira muqaddar ki tasht-az-bam hai asiri
zamane ka inqalab dekho qafas ke saa.e men ashiyan hai
vahi gharibon ka bhi ḳhuda hai bahut hai jiine ko ye sahara
‘siraj’ is daur se guzarna magar baḌa saḳht imtihan hai
Leave a Reply