mas.ala ye hai ki us ke dil men ghar kaise karen
darmiyan ke fasle ka tai safar kaise karen
koi sunta hi nahin arz-e-hunar kaise karen
ḳhud ko ham apni nazar men mo’tabar kaise karen
aḳhiri patthar se be-samt-o-nishan jaana hai ab
ham khuli ankhon se ye andha safar kaise karen
jaan ke jaane ka andesha bahut hai ab ki baar
ma.arka bhi aḳhiri karna hai sar kaise karen
kuchh dinon ki baat ho to kaaT den ankhon men raat
niind agar aa.e na ‘farruḳh’ umr bhar kaise karen
Leave a Reply