rah gaya insan akela bastiyon ke darmiyan
gum hua suraj ḳhud apni tabishon ke darmiyan
haath lagte hi bikhar jaate hain rangon ki tarah
phuul se paikar samay ki andhiyon ke darmiyan
ruuh ki andhi gali men chiḳhta hai rat-din
jism ka zaḳhmi parinda ḳhvahishon ke darmiyan
ban gaya zanjir mere paanv ki mera vajud
qaid hai dariya bhi apne sahilon ke darmiyan
ḳhushk miTTi men mili hai phir na.e mausam ki baas
phir shajar nikhre baraste paniyon ke darmiyan
har taraf manzil nazar aa.e to phir ja.un kahan
soch ka patthar bana huun raston ke darmiyan
naqsh hai ankhon men apni mausam-e-gul ka saman
aa.ine shabnam ke rakkhe hain gulon ke darmiyan
yuun safar ki gard men lipTa hua paaya ‘nadim’
jis tarah aaya ho suraj badalon ke darmiyan
Leave a Reply