Rah Gaya Insan Akela Bastiyon Ke Darmiyan

rah gayā insāñ akelā bastiyoñ ke darmiyāñ

gum huā sūraj ḳhud apnī tābishoñ ke darmiyāñ

haath lagte hī bikhar jaate haiñ rañgoñ kī tarah

phuul se paikar samay kī āñdhiyoñ ke darmiyāñ

ruuh kī andhī galī meñ chīḳhtā hai rāt-din

jism kā zaḳhmī parinda ḳhvāhishoñ ke darmiyāñ

ban gayā zanjīr mere paañv kī merā vajūd

qaid hai dariyā bhī apne sāhiloñ ke darmiyāñ

ḳhushk miTTī meñ milī hai phir na.e mausam kī baas

phir shajar nikhre baraste pāniyoñ ke darmiyāñ

har taraf manzil nazar aa.e to phir jā.ūñ kahāñ

soch kā patthar banā huuñ rāstoñ ke darmiyāñ

naqsh hai āñkhoñ meñ apnī mausam-e-gul kā samāñ

aa.ine shabnam ke rakkhe haiñ guloñ ke darmiyāñ

yuuñ safar kī gard meñ lipTā huā paayā ‘nadīm’

jis tarah aayā ho sūraj bādaloñ ke darmiyāñ

Leave a Comment