dil men zaḳhmon ki na.i fasl ugane nikle
dard ke phuul bayaban men khilane nikle
har imarat pe na.e saal ka katba dekha
pahunche nazdik to asar purane nikle
pahle har dar pe rakhe sho.ala-bayani ke diye
jal uTha shahr to phir aag bujhane nikle
chand jab ruuTh ke ruḳhsat hua bam-o-dar se
log tapte hue suraj ko manane nikle
har qadam talḳhi-e-ta.abir ke patthar barse
ḳhvab-zaron ko kabhi ham jo sajane nikle
dil ne jab qaid-e-ta.alluq se riha.i mangi
qurbaton ke liye kuchh aur bahane nikle
Leave a Reply