Poet
vaaiz ke main zarur darane se dar gaya
jam-e-sharab laae bhi saaqi kidhar gaya
bulbul kahan bahar kahan baghban kahan
vo din guzar gae vo zamana guzar gaya
aisi hava chali miri aahon ki raat ko
sab asman pe khirman-e-anjum bikhar gaya
achchha hua jo ho gae vahdat-parast ham
fitna gaya fasad gaya shor-o-shar gaya
kaabe ki samt sajda kiya dil ko chhod kar
tu kis taraf tha dhyan hamara kidhar gaya
phir sair-e-lala-zar ko ham ai ‘saba’ chale
aai bahar dagh-e-junun phir ubhar gaya
Leave a Reply