Najma Shaheen Khosa
ye jo ishq-e-masnad ke log hain unhen ramz saare sikha piya
ye junun-e-ishq ki dastan unhen harf harf suna piya
mire charagar main huun dar-ba-dar main to thak ga.i hai ajab safar
miri be-nishan si hain manzilen mujhe rasta bhi dikha piya
na hudud men na quyud men mira dil tire hi vajud men
ye sujud ka hasin pairahan miri ruuh par to saja piya
main to aas thi main to pyaas thi kisi phuul ki main bhi baas thi
miri pattiyan giren ja-ba-ja unhen shaḳh par to saja piya
main faqir huun main haqir huun kisi ḳhvab ki na asiir huun
main aziiz huun to tujhe hi bas so aziz-tar hi bana piya
main falak se aa.i ḳhata miri use DhunDna hai vafa miri
ye jafa ki jo hain haqiqaten miri aankh ko vo dikha piya
mire asman mire sa.eban tu hi raz-dan tu hi mehrban
jahan la-makan ke hain silsile vahin mera ghar bhi bana piya
ye jo arzuon ka des hai ye jo ḳhaak ḳhaak sa bhes hai
jo azal abad ka ye bhed hai use bhed hi men bata piya
ye qadam qadam pe basharaten ye nazar nazar men ziyaraten
ye basarten ye bujharten mire shahr-e-dil ko dikha piya
ye jo mere man men hai raushni yahi zindagi yahi bandagi
miri fikr men tire zikr men jo charagh hain vo jala piya
Leave a Reply