Diwane Ki Jannat

mera ye khvab ki tum mere qarib aai ho

apne saae se jhijakti hui ghabrati hui

apne ehsas ki tahrik pe sharmati hui

apne qadmon ki bhi avaz se katrati hui

apni sanson ke mahakte hue andaz liye

apni khamoshi men gahnae hue raaz liye

apne honton pe ik anjam ka aghaz liye

dil ki dhadkan ko bahut rokti samjhati hui

apni paael ki ghazal-khvani pe jhallati hui

narm shanon pe javani ka naya baar liye

shokh ankhon men hijabat se inkar liye

tez nabzon men mulaqat ke asar liye

kaale balon se bikharti hui champa ki mahak

surkh aariz pe damakte hue shalon ki chamak

nichi nazron men samai hui khuddar jhijak

nuqrai jism pe vo chand ki kirnon ki phuvar

chandni raat men bujhta hua palkon ka sitar

fart-e-jazbat se mahki hui sanson ki qatar

duur maazi ki bad-anjam rivayat liye

nichi nazren vahi ehsas-e-mulaqat liye

vahi mahaul vahi taron bhari raat liye

aaj tum aai ho dohrati hui maazi ko

mera ye khvab ki tum mere qarib aai ho

kaash ik khvab rahe talkh haqiqat na bane

ye mulaqat bhi divane ki jannat na bane

Leave a Comment