Mubashshir Saeed
girya-zari bhi karun shor macha.un main bhi
halat hal-e-parindon ko suna.un main bhi
zindagi roz naya ruup dikhati hai mujhe
arsa-e-jism kabhi chhoḌ ke ja.un main bhi
hazrat-e-qais agar aap ijazat de den
kabhi vahshat ke liye dasht men aa.uun main bhi
saare mahaul ko de duun kisi tabir ka vajd
apni masti men koi ḳhvab suna.un main bhi
main koi ishq karun haar ke jiita hua ishq
yaani ushshaq men kuchh naam kama.un main bhi
aaj tanha.i ke manzar ne sujhaya hai ‘sa.id’
mausam-e-hijr ki tasvir bana.un main bhi
Leave a Reply