Sanjay Mishra Shauq
dho ke ashkon se ka.i baar ujali hui hai
dhuup men jal ke vo tasvir bhi kaali hui hai
main girunga to isi ḳhaak se uTThega koi
haq-paraston se ye duniya kabhi ḳhali hui hai
lucknow naaz hai jis par vahi kohna tahzib
ham ne virse men saliqe se sambhali hui hai
ab na tasvir hai koi na hai kilon ki chubhan
dil ki divar isi saal se ḳhali hui hai
ḳhaak men mil gaya jab ruuh ka ḳhali pinjra
mansab-e-ishq pe tab apni bahali hui hai
dasht-e-vahshat ka koi ḳhauf nahin hai ham ko
sab bhula dene ki tadbir nikali hui hai
tere jaisa to kahin koi nahin hai janan
ham ne afaq ki manzil bhi khangali hui hai
haan miri fikr alag hai to sabab hai is ka
dard ke chulhe pe sau baar ubali hui hai
apna haq mangna hakim se baghavat hai magar
ye rivayat bhi hamari hi to Daali hui hai
mere un sheron pe sar dhunti rahegi duniya
jin men timsal-gari dekhne vaali hui hai
Leave a Reply