Raat Kya Soch Raha Tha Main Bhi

Rasa Chughtai

raat kya soch raha tha main bhi

apne aalam ka ḳhuda tha main bhi

vo bhi kuchh ḳhud se alag tha jaise

apne saa.e se juda tha main bhi

vo bhi tha ek varaq saada kitab

harf-e-be-saut-o-sada tha main bhi

surat-e-shaḳh-e-samar-dar tha vo

surat-e-dast-e-saba tha main bhi

vo bhi ik halqa-e-girdab men tha

aur bas Duub chala tha main bhi

phuul khilne ka ajab mausam tha

aa.ina dekh raha tha main bhi