Azad Gulati
tere qadmon ki aahaT ko tarsa huun
main bhi tera bhula hua ik rasta huun
biite lamhon ke jhonke jab aate hain
pal do pal ko main phir se khil uThta huun
mujh se muzhda na.i ruton ka paoge
yaaro main is peḌ ka antim patta huun
shayad tum bhi ab na mujhe pahchan sako
ab main ḳhud ko apne jaisa lagta huun
aaj ke kaale saa.e kal tak phailenge
mere bachcho main is baat se Darta huun
tum bhi kaise DhunD sakoge ab mujh ko
main ḳhud apne-ap se ojhal rahta huun
sayon ki ḳhvahish ne mujhe jalaya hai
ab main in ke naam se tapne lagta huun
mujh se mil kar kis ko yaqin ab aa.ega
main bhi tera TuuTa hua ik rishta huun
Leave a Reply