Tanhai Mein

mere shanon pe tira sar tha nigahen namnak

ab to ik yaad si baaqi hai so vo bhi kya hai

ghar gaya zehn gham-e-zist ke andazon men

har hatheli pe dhare soch raha huun baitha

kaash us vaqt koi pir-e-khamida aa kar

kisi azurda tabiat ka fasana kahta

ik dhundlaka sa hai dam tod chuka hai suraj

din ke daman pe hain dhabbe se riya-kari ke

aur maghrib ki fana-gah men phaila hua khuun

dabta jaata hai siyahi ki tahon ke niche

duur talab ke nazdik vo sukhi si babul

chand tuute hue viran makanon se pare

haath phailae barahna si khadi hai khamosh

jaise ghurbat men musafir ko sahara na mile

us ke pichhe se jhijakta hua ik gol sa chand

ubhra be-nur shuaon ke safine ko liye

main abhi soch raha huun ki agar tu mil jaae

zindagi-go hai giran-bar pa itni na rahe

chand aansu gham-e-giti ke liye chand nafas

ek ghaav hai jise yuun hi siye jaate hain

main agar ji bhi raha huun to taajjub kya hai

mujh se lakhon hain jo be-sud jiye jaate hain

koi markaz hi nahin mere takhayyul ke liye

is se kya faeda jiite rahe aur ji na sake

ab irada hai ki patthar ke sanam pujunga

taaki ghabraun to takra bhi sakun mar bhi sakun

aise insanon se patthar ke sanam achchhe hain

un ke qadmon pe machalta ho damakta hua khuun

aur vo meri mohabbat pe kabhi hans na saken

main bhi be-rang nigahon ki shikayat na karun

ya kahin gosha-e-ahram ke sannate men

ja ke khvabida farain se itna puchhun

har zamane men kai the ki khuda ek hi tha

ab to itne hain ki hairan huun kis ko pujun

ab to maghrib ki fana-gah men vo sog nahin

aks tahrir hai ik raat ka halka halka

aur pur-soz dhundalke se vahi gol sa chand

apni be-nur shuaon ka safina kheta

ubhra namnak nigahon se mujhe takta hua

jaise ghul kar mire aansu men badal jaega

haath phailae udhar dekh rahi hai vo babul

sochti hogi koi mujh sa hai ye bhi tanha

aina ban ke shab-o-roz taka karta hai

kaisa talab hai jo us ko hara kar na saka

yuun guzare se guzar jaenge din apne bhi

par ye hasrat hi rahegi ki guzare na gae

khuun pi pi ke pila karti hai angur ki bel

gar yahi rang-e-tamanna tha chalo yunhi sahi

khuun piiti rahi badhti rahi konpal konpal

chhanv taron ki shagufon ko numu deti rahi

narm shakhon ko thapakte rahe ayyam ke haath

yunhi din biit gae subh hui shaam hui

ab magar yaad nahin kya tha maal-e-ummid

ek tahrir hai halki si lahu ki baaqi

bel phalti hai to kanton ko chhupa leti hai

zindagi apni pareshan thi pareshan hi rahi

chahta ye tha mire zakhm ke angur bandhen

ye na chaha tha mira jam-e-tahi rah jaae

haath phailae udhar dekh rahi hai vo babul

sochti hogi koi mujh sa hai ye bhi tanha

ghir gaya zehn gham-e-zist ke andazon men

kaisa talab hai jo us ko hara kar na saka

kaash is vaqt koi pir-e-khamida aa kar

mere shanon ko thapakta gham-e-tanhai men

Leave a Comment