Majnun Bana Diya to Mukammal Bana Diya

Zebunnisaa Zaibii

majnun bana diya to mukammal bana diya

mujh ko to mere ishq ne pagal bana diya

dil ne kisi ki yaad ko chhoḌa nahin kabhi

dil ne kisi ki yaad ko anchal bana diya

itna main teri yaad men barsi huun TuuT kar

ankhon ko jaise main ne to badal bana diya

logon ka ik hujum tha jaane kidhar gaya

basti ko kis ne raat men jangal bana diya

koi to is jahan men hai na-puḳhta aur ḳhaam

ya rab kisi ko tu ne mukammal bana diya

koi to ilm-o-fikr men hai bahr-e-be-karan

insan koi tu ne to aj.hal bana diya

‘zebi’ main ḳhud ko sona samajhti thi aur bas

mujh ko kisi ne dekh lo pital bana diya