Takhliq Pe Fitrat Ki Guzarta Hai Guman Aur

takhliq pe fitrat ki guzarta hai guman aur

is adam-e-khaki ne banaya hai jahan aur

ye subh hai suraj ki siyahi se andheri

aaegi abhi ek sahar mahr-chakan aur

badhni hai abhi aur bhi mazlum ki taqat

ghatni hai abhi zulm ki kuchh tab-o-tavan aur

tar hogi zamin aur abhi khun-e-bashar se

roega abhi dida-e-khunaba-fiashan aur

badhne do zara aur abhi kuchh dast-e-talab ko

badh jaegi do chaar shikan-e-zulf-e-butan aur

karna hai abhi khun-e-jigar sarf-e-baharan

kuchh der uthana hai abhi naz-e-khizan aur

ham hain vo bala-kash ki masaib se jahan ke

ho jaate hain shaista-e-gham-ha-e-jahan aur

Leave a Comment