Usko Pa Jaun Kabhi Aisa Muqaddar Hai Kahan

us ko pā jā.ūñ kabhī aisā muqaddar hai kahāñ

aur uThā luuñ us se dil ye zor dil par hai kahāñ

ghuT ke rah jaa.e na sar hī meñ kahīñ zauq-e-sujūd

maiñ to sar har dar pe rakh duuñ par koī dar hai kahāñ

naġhma-rezī saaz kī bāzīgarī mutrib kī hai

naġhma koī be-navā tāroñ ke andar hai kahāñ

us ke hoñToñ se jhalaktī hai mirī lab-tishnagī

khiñch rahī hai mai kahāñ par aur sāġhar hai kahāñ

maiñ vahāñ rahtā huuñ gunjā.ish jahāñ merī nahīñ

kyā kahūñ kis ghar meñ rahtā huuñ mirā ghar hai kahāñ

ḳhud ko dekhā hai jab un āñkhoñ meñ jhāñkā hai ‘muhib’

mujh ko itnā qurb ḳhud se bhī mayassar hai kahāñ

Leave a Comment