mire raat din kabhi yuun bhi the ka.i ḳhvab mere darun bhi the
ye jo roz-o-shab hain qarar men yahi pahle vaqf-e-junun bhi the
mira dil bhi tha kabhi aa.ina kisi jam-e-jam se bhi mavara
ye jo gard gham se hai bujh gaya isi aa.ine men fusun bhi the
ye maqam yuun to fughan ka tha pa hanse ki taur jahan ka tha
tha bahut kaḌa ye maqam par ka.i ek is se fuzun bhi the
abhi aql aa bhi ga.i to kya abhi hans diye bhi to kya hua
hami dasht-e-ishq-e-navard the hami log ahl-e-junun bhi the
ye jo sail-e-gham sar-e-chashm-e-nam hai ravan-davan ka.i roz se
use kya ḳhabar isi dasht men ka.i ḳhvab mahv-e-sukun bhi the
Leave a Reply