Aakhiri Khat

vo vaqt miri jaan bahut duur nahin hai

jab dard se ruk jaengi sab ziist ki rahen

aur had se guzar jaega andoh-e-nihani

thak jaengi tarsi hui nakam nigahen

chhin jaenge mujh se mire aansu miri aahen

chhin jaegi mujh se miri be-kar javani

shayad miri ulfat ko bahut yaad karogi

apne dil-e-masum ko nashad karogi

aaogi miri gor pe tum ashk bahane

nau-ḳhez baharon ke hasin phuul chadhane

shayad miri turbat ko bhi thukra ke chalogi

shayad miri be-sud vafaon pe hansogi

is vaz-e-karam ka bhi tumhen paas na hoga

lekin dil-e-nakam ko ehsas na hoga

al-qissa maal-e-gham-e-ulfat pe hanso tum

ya ashk bahati raho fariyad karo tum

maazi pe nadamat ho tumhen ya ki masarrat

ḳhamosh pada soega vamanda-e-ulfat

Leave a Comment