sahib-e-mehr-o-vafa arz-o-sama kyuun chup hai
ham pe to vaqt ke pahre hain khuda kyuun chup hai
be-sabab gham men sulagna miri aadat hi sahi
saaz khamosh hai kyuun shola-nava kyuun chup hai
phuul to sahm gae dast-e-karam se dam-e-subh
gungunati hui avara saba kyuun chup hai
khatm hoga na kabhi silsila-e-ahl-e-vafa
soch ai davar-e-maqtal ye faza kyuun chup hai
mujh pe taari hai rah-e-ishq ki asuda thakan
tujh pe kya guzri mire chand bata kyuun chup hai
janne vaale to sab jaan gae honge ‘alim’
ek muddat se tira zehn-e-rasa kyuun chup hai
Leave a Reply