Hosh Tirmizi
la.ega rang zabt-e-fughan dekhte raho
phuTegi har kali men zaban dekhte raho
barpa sar-e-hayat hai ik hashr-e-dar-o-gir
deta hai kaun kis ko amaan dekhte raho
dam-bhar ko astan-e-tamanna pe hai hujum
jaa.e bichhaḌ ke kaun kahan dekhte raho
milne ko hai ḳhamoshi-e-ahl-e-junun ki daad
uThne ko hai zamin se dhuan dekhte raho
mahfil men un ki sham.a jali hai ki jan-o-dil
khulta hai kab ye raz-e-nihan dekhte raho
hai barg-e-gul ko barish-e-miqraz ke payam
tarz-e-tapak-e-ahl-e-jahan dekhte raho
aa.i nigar-e-gham ki sada ‘hosh’ ham chale
tum imtiyaz-e-sud-o-ziyan dekhte raho
Leave a Reply