Shahida Hasan
hava pe chal raha hai chand rah-var ki tarah
qadam utha rahi hai raat ik savar ki tarah
fasil-e-vadi-e-khayal se utar rahi hai shab
kisi khamosh aur udaas abshar ki tarah
tadap raha hai barishon men mere jism ka shajar
siyah abr men ghire hue chinar ki tarah
inhi udasiyon ki kaenat men kabhi to main
khizan ko jiit lungi mausam-e-bahar ki tarah
tire khayal ke safar men tere saath main bhi huun
kahin kahin kisi ghubar-e-rah-guzar ki tarah
ubuur kar saki na faslon ki gardishon ko main
buland ho gai zamin kohsar ki tarah
tire diye ki raushni ko dhundta hai shaam se
mira makan kisi lute hue dayar ki tarah
Leave a Reply