Ishq Ne Jab Bhi Kisi Dil Pe Hukumat Ki Hai

Jawad Sheikh

ishq ne jab bhi kisi dil pe hukumat ki hai

to use dard ki me.araj inayat ki hai

apni ta.id pe ḳhud aql bhi hairan hui

dil ne aise mire ḳhvabon ki himayat ki hai

shahr-e-ehsas tiri yaad se raushan kar ke

main ne har ghar men tire zikr ki jur.at ki hai

mujh ko lagta hai ki insan adhura hai abhi

tu ne duniya men use bhej ke ujlat ki hai

shahr ke tira-tarin ghar se vo ḳhurshid mila

jis ki tanvir men tasir qayamat ki hai

sochta huun ki main aise men kidhar ko ja.un

tera milna bhi kaThin, yaad bhi shiddat ki hai

is tarah aundhe paḌe hain ye shikasta jazbe

jaise ik vahm ne in sab ki imamat ki hai

ye jo bikhri hui lashen hain varaq par ‘javvad’

ye mire zabt se lafzon ne baghavat ki hai