Safdar Hamadani
le tiri avaz ko qaid-e-sama.at kar liya
haan ghazal ke ruup ko aks-e-taba.at kar liya
bhigti is shaam men us ne pukara hai mujhe
lag raha hai jis tarah hajj-e-mohabbat kar liya
sochta huun us se puchhun jan-e-‘safdar’ kis liye
aam se ik aadmi ko apni aadat kar liya
aaj phir shanon pe bikhri zulf hai allah ḳhair
lag raha hai aaj phir ahd-e-baghavat kar liya
rat-din rahta hai us ko apni chahat ka ḳhayal
us ne ḳhud ko is tarah vaqf-e-ibadat kar liya
kar liya hai shab ki tanha.i men milne ka ḳhayal
muskurahaT ko tiri radd-e-adavat kar liya
is kitab-e-ishq ki takmil ‘safdar’ ho ga.i
us ne barson baad iz.har-e-mohabbat kar liya
Leave a Reply